“Dëmtuesit e VV dhe përçarësit e BESËS, varrtarë të shpresës rinore!”

“Dëmtuesit e VV dhe përçarësit e BESËS, varrtarë të shpresës rinore!”

Në një koment të publikuar në faqen e tij të FB, shkrimtari ynë Kim Mehmeti pohon se kundërshtarët e kryetarit të VV dhe përkrahësit e ish kryetarit të Lëvizjes BESA, Kasami do mbahen mend si varrtarë të shpresave shqiptare për të dalë nga mjerimi politik në të cilin ndodhen. Sipas tij, ‘molliqajt’ e VV dhe ‘hoxhallarët e llërcës’ të Lëvizjes Besa, janë duke e dëmtuar indin politik shqiptarë. Kim Mehmeti pohon se me përçarjet që ndodhën në lëvizjen Besa u arrit qëllimi i qarqeve antishqiptare që të dëshmojnë se shqiptarët e Maqedonisë janë të papjekur politikisht. Me çka edhe shuhet shpresa se ata do mund të dalin nga kjo amulli politike ku ndodhen. Më poshtë mund ta lexoni komentin e plotë të Kim Mehmetit.

“Për shumëçka dhe me shumëçka Lëvizja Vetëvendosje në Kosovë dhe Besa në Maqedoni ishin djep i vrullit rinorë si dhe, emblemë e shpresës se është e mundur dalja e shoqërive shqiptare nga balta e hajdurokracisë dhe e akulturimit të tyre! Andaj edhe sikur çdo gjë të jetë ashtu siç pohojnë ‘molliqajt’ e VV dhe ‘hoxhallarët e llërcës’ të BESËS, duhet thënë se ata do mbahen mend si dëmtues dhe varrtarë të vrullit dhe shpresës rinore! Shkurt e shqip: njeriu që ka sadopak ndjenjë ndaj të mirës kolektive dhe që ka ‘din e iman’, e flijon vetveten, i heshtë inatet vetjake, heq dorë nga interesat personale, e nuk e dëmton, as e shkatërron, djepin ku mëkohet e mirëmbahet shpresa rinore. Posaçërisht në një Maqedoni ku qarqet antishqiptare duan të dëshmojnë se shqiptarët e këtushëm janë politikisht të papjekur. Andaj edhe mund të thuhet se të gjithë ata të Lëvizjes BESA që i zhveshën selitë e vjetra për të hap të reja, nuk i dëmtuan kundërshtarët e tyre partiak, por e ndihmuan zhbërjen e indit politikë shqiptar dhe shpërnguljen e të rinjve të pashpresë drejt perëndimit dhe drejt partive maqedonase!”, shkruan Kim Mehmeti.