Deri në 25 kafe brenda dite nuk ndikojnë negativisht në zemër

Deri në 25 kafe brenda dite nuk ndikojnë negativisht në zemër

Adhuruesit e kafes të cilët i pinë deri në 25 kafe në ditë tani mund të sigurohen se kjo pije nuk është e dëmshme për zemrën e tyre, thonë shkencëtarit.

Disa studime të mëhershme kanë sugjeruar se kafja i ngurtëson arteriet, duke shkaktuar presion mbi zemrën dhe duke e rritur mundësinë për sulm në zemër apo tru.

Madje, studimet e mëhershme edhe u kishin këshilluar adhuruesve të kafes që ta zvogëlojnë konsumimin.

Por, një studim i ri me më shumë se 8,000 njerëz përgjatë Mbretërisë së Bashkuar ka zbuluar se konsumimi i pesë kafeve në ditë, madje edhe konsumimi i deri në 25 kafe në ditë, nuk është më i dëmshëm për arteriet sesa konsumimi i më pak se një kafe në ditë.

Hulumtimi, i cili pjesërisht është financuar nga Fondacioni Britanik i Zemrës, është duke u prezantuar në konferencën e Shoqatës Kardiovaskulare Britanike në Mançester, transmeton Telegrafi.

Ekspertët britanikë i kanë ndarë 8,412 njerëz në tri grupe për këtë studim.

Grupi i parë përbëhej me ata që i konsumonin më pak se 1 kafe në ditë; grupi i dytë me ata që i konsumimin mes 1 dhe 3 kafe në ditë; dhe grupi i tretë me ata që i konsumonin më shumë se 3 kafe në ditë.

Disa prej personave në grupin e tretë i kishin konsumuar deri në 25 kafe në ditë, megjithëse numri mesatar i kafeve që ky grup i konsumonte ishte 5 kafe në ditë.

Sidoqoftë, kështu hulumtuesit zbuluan se edhe ata që i konsumojnë deri në 25 kafe brenda dite nuk janë më të rrezikuar nga dëmtimi i artereve sesa ata që pinë më pak se një kafe.

Të gjithë pjesëmarrësit iu ishin nënshtruar testeve të ndryshme shëndetësore të zemrës, ndërkaq rezultatet kishin mbetur të njëjta edhe kur ishin marrë parasysh faktorët tjerë si pesha, mosha, etj.

TAGS