Këto po konsiderohen të metat e iPhone 11

Këto po konsiderohen të metat e iPhone 11

Foto ilustrim: Drew Hays

Apple, shitjet e të cilëve kanë pësuar rënie në muajt e fundit, hodhën në treg iPhone 11.

Versioni i ri ka kamerë më interesante, ekran më të mirë, teknologji të re për të bërë foto, por shumë ekspertë në internet thonë se do të dalë mode pa u hedhur mirë në treg, pasi nuk e ka rrjetin 5G.

5G nuk është një teknologji e largët. Përkundrazi, ka qenë një nga temat më të përmendura të vitit. Huawei ka kryer marrëveshje për ta realizuar ndërtimin e rrjetit në shumë vende, ndërkohë që Koreja e Jugut, Britania dhe disa vende në Evropë e kan vënë në punë.

Tre celularët e Apple, iPhone 11, iPhone 11 Pro dhe iPhone 11 Pro Max kanë parametra shumë të larta, por asnjëri nuk ka 5G. Huawei, Samsung, Oppo, LG dhe Oneplus janë disa nga kompanitë që e kanë vendosur tashmë sistemin 5G në telefonët e tyre, madje dhe Sony është duke punuar për ta nxjerrë së shpejti.

Po Apple, pse ka mbetur pas? Argumenti i Apple është se 5G nuk është përhapur mjaftueshëm për të ndërtuar diçka të qëndrueshme, ndaj nuk e kanë vendosur. Parimi i tyre është që në telefon të vendosin vetëm pjesë që janë testuar disa herë dhe që u është garantuar cilësia.

Kjo mund të jetë e vërtetë, por ekspertët thonë se kur iPhone 11 të jetë përhapur në treg, 5G mund të ketë bërë hapa domethënës, dhe Apple do të ishte shumë mbrapa.

Frika

Të martën, iPhone hodhi në treg tre modelet më të fundit; iPhone 11, iPhone 11 Pro dhe iPhone 11 Pro Max, shumë më të avancuar se paraardhësit e tyre, respektivisht iPhone XS, XS Max dhe XR.

Në një kohë kur fansat e kompanisë gjigante janë mëse të entuziazmuar rreth risive në fjalë, disa të tjerëve, iPhone-t më të fundit u kanë shkaktuar ndjesi neverie, ankthi apo djersitjeje për shkak të fobisë së tyre, e njohur si tripofobia.

Fobia në fjalë s’është gjë tjetër veçse frikë kundrejt sipërfaqeve me vrima, vrimave të dendura por nga ana tjetër tepër të imëta, të ngjashme me hojet e bletëve. Kështu, 3 kamerat të përfshira në celularët më të fundit kanë nxitur te këta persona kruajtje, të përziera dhe ngarkesa negative emocionale.

Përmes postimeve të shumta në rrjetet sociale, tripofobikët e kanë krahasuar kamerën e trefishtë me të tjera imazhe ngacmuese për ta./Top Channel/

TAGS