Lluka: Trepça ishte dhe do të jetë krenaria e Kosovës

Këshilltari i Kryeministrit Haradinaj, i emëruar Mbajtës i Dosjes për çështjen e personave të zhdukur, Jahja Lluka, ka kujtuar minatorët e Trepçës, të cilët 30 vite më parë, ishin ngujuar në minierë dhe kishin filluar grevën e urisë për të mbrojtur Kosovën nga regjimi i Sllobodan Millosheviqit.

Përmes një përmes një shkrimi në Facebook, ka treguar për vështirësitë që ishin ballafaquar minatorët nga okupatori serb.

Lluka ka thënë se Trepça ishte fryma e Kosovës dhe krenaria e saj.

“Ishin kohë të turbullta kur rezistenca paqësore ndaj një regjimi fashist filloi ndër minatorët. U bënë 30 vite që kur minatorët e Trepçës filluan grevën e urisë. Mbi 1,300 minatorë, kishin hyrë në grevë urie për të mbrojtur autonominë e Kosovës, ky hap i guximshëm po fillonte zhbërjen e Jugosllavisë.

Greva historike e minatorëve të Trepçës bëri bujë të madhe në vend duke kaluar në rezistencë gjithë popullore, kështu filluan t’iu dridhen themelet Serbisë dhe regjimit të saj e cila si qëllim kishte zhbërjen e popullit shqiptar në Kosovë

Poashtu greva nuk kaloi pa bërë bujë në mediat dhe qarqet diplomatike ndërkombëtare të cilat po përcillnin me vëmendje fillimin e zhbërjes së një fuqie të madhe në atë kohë siç ishte Jugosllavia.

Ky ishte vetëm fillimi i ngjarjeve të njëpasnishme të cilat përshihen një dekade duke mbaruar me luftëra dhe shkëputje të shteteve të cilat nuk duronin politikat naciste serbe.

Pas 29 viteve kujtojmë vendosmërinë e vëllezërve shqiptarë të cilët me çdo çmim nuk hoqën dorë nga lufta për liri dhe demokraci sepse zëri i tyre u bë udhërrëfyes për një popull të vuajtur dhe të përndjekur çnjerëzisht për një shekull.

Dihet që Trepça ishte një gjigant i metalurgjisë dhe shtyllë kyçe në zhvillimin ekonomik të Jugosllavisë.

Veç tjerash Trepça ishte fryma e Kosovës dhe krenaria e saj.

Dhe sot mbetet e tillë me gjithë pozitën e saj të vështirë në të cilën gjendet.

Rinormalizimi i Trepçës dhe vënia e saj tërësisht në funksion do ta ringjallte ekonominë e brishtë të Kosovës, e cila po kalon në këtë faze të padëshirueshme tranzicioni.

Nxitja e investimeve nga vendet perëndimore në Trepçë do ishte e mirëseardhur pasi deri më tani nga qeveritë tjera nuk ka pasur ndonjë program konkret që do ishte frytdhënës.

Sot më duhet t’i përgëzoj të gjithë ata minatorë të cilët me gjithë kushtet e vështira kanë motiv për punë dhe e mbajnë gjallë këtë gjigant metalurgjik të rëndësishëm për Mitrovicën por dhe për gjithë Kosovën.

Për nder të qëndresës së pathyeshme të minatorëve të Trepçës propozoj që në Stantërg të ndërtohet një monument në shenjë falënderimi dhe përkujtimi për stoicizmin e tyre që tejkaloi kohët dhe u vulos me shpalljen e pavarësisë së Kosovës”, ka shkruar Lluka në Facebook./Telegrafi/

TAGS