Në Maqedoni pas tetë, dhjetë viteve, nuk duhet të mendohet për parti etnike, por për formimin e një partie në bazë të ideve programore, e jo ideve partiake, nacionale… Me rëndësi është që të shikohet drejt ardhmërisë. Ta harrojmë të kaluarën. Ajo të na paraqitet si ëndërr shumë e keqe. Me rëndësi është që të na ndodh pajtim ndërmjet dy etnikumeve, pasi që vetëm kështu mund të ndërtojmë ardhmëri më të mirë për Maqedoninë dhe për qytetarët e saj.
Kapital: Pse erdhët në Maqedoni?
Ahmeti: Unë jam i lindur në Maqedoni dhe kam ndër mend të vdes në Maqedoni. Ju nuk e dini ndjenjën të jetohet jashtë Maqedonisë. Atdheu është mbi të gjitha.
Kapital: Si ndodhi që Ju të bëheni lider, kush Ju ftoi në Maqedoni?
Ahmeti: Për këtë mund të flasin bashkëpunëtorët e mi.
Kapital: A do të thotë kjo se kur të përfundojë lufta, ju do ta sillni familjen tuaj në Maqedoni?
Ahmeti: Normalisht.
Kapital: A shpresoni që të jeni në mesin e atë amnistuarve, ose mendoni se autoritetet maqedonase do t`ju trajtojnë si kriminel lufte dhe përgjegjës për gjithë atë që ndodhi në Maqedoni?
Ahmeti: Kjo listë është për ata njerëz të cilët kanë qenë në burg dhe nuk merret me të gjithë ushtarët të cilët ishin pjesëtarë të UÇK-së. Ndërsa, sipas deklaratës së nënshkruar nga Trajkovski, amnistia është për të gjithë ushtarët të cilët ishin në UÇK. Ndaj këtu jam edhe unë.
Kapital: UÇK-ja është e çarmatosur, ndërsa në rrethinën e Tetovës ende gjuhet. Kush gjuan?
Ahmeti: Është fakt se UÇK-ja është e demobilizuar, çarmatosur. Ne i respektojmë të gjitha marrëveshjet e nënshkruara me faktorin ndërkombëtar dhe me të gjithë faktorët e brendshëm në Maqedoni. Por, ju thoni se po gjuet në Maqedoni. Po gjuet, por kjo gjuajtje vjen nga persona të papërgjegjshëm. Unë nuk mund të konfirmoj se këta persona të papërgjegjshëm kanë qenë ose janë pjesë e UÇK-së. Por, është fakt se të gjithë ne jemi qytetarë të Republikës së Maqedonisë dhe të gjithë jemi bashkëpjesëmarrës në këtë realitet. Në Maqedoni edhe më herët është gjuajtur edhe para se të mbijë lufta, madje edhe në periudhën e pasluftës. Ata janë persona të papërgjegjshëm të cilët bartin porosi negative për paqen.
Kapital: A do të thotë kjo se nuk keni kontrollë mbi të gjithë shqiptarët e armatosur të cilët kanë qenë në UÇK?
Ahmeti: Ju thash edhe më parë, kemi shumë persona të papërgjegjshëm edhe nga pala maqedonase, nuk është vetëm pala shqiptare që gjuan, edhe kjo duhet marrë parasysh. Por, ne nuk kemi institucione në duart tona përmes të cilave do të mund t`i kontrollonim të gjitha gjuajtjet të cilat dëgjohen në Maqedoni. Në parim të gjitha këto ngjarje janë të papranueshme, nuk janë të mira, pa dallim se nga cila anë mbijnë. Është shumë e rëndësishme që të gjitha këto ngjarje të zvogëlohen gradualisht, pasi që ato ndoshta ende janë rrezik për civilët, për qytetarët.
Kapital: A mund të thuhet se pikërisht Marrëveshja-kornizë është ajo për çka luftuan shqiptarët në Maqedoni?
Ahmeti: Sigurisht, Po. Duhet të jemi të realtë. Parësore është se të gjithë ne jemi qytetarë të Republikës së Maqedonisë. Ndihem shumë mirë që të gjithë jemi shumë të ndryshëm, maqedonas, shqiptarë. Në të kaluarën shqiptarët kanë qenë të diskriminuar në të gjitha pikëpamjet, në të gjitha fushat, politike, ekonomike. Nëse fillojmë t`i analizojmë të gjitha padrejtësitë të cilat janë ekspozuar në këtë shtet, atëherë, koha është shumë e shkurtër për t`i korigjuar të gjitha ato. Me rëndësi është që të shikohet drejt ardhmërisë. Ta harrojmë të kaluarën. Ajo të na paraqitet sikur ëndërr shumë e keqe. Me rëndësi është që të na ndodh pajtim ndërmjet dy etnikumeve, pasi që vetëm kështu mund të ndërtojmë ardhmëri më të mirë për vetë Maqedoninë dhe për qytetarët në të. Prioritare është që mirë të kuptohet marrëveshja paqesore, tërësia dhe porosia e saj. Marrëveshja paqesore duhet t`u qartësohet të gjithë qytetarëve. Vetëm kështu mund t`i shërbejmë shtetit tonë. Duke e materializuar në praktikë këtë marrëveshje e tejkalojmë mundësinë që ajo të mbetet vetëm në letër. Nuk mund të ndihet paqja në një komunitet, nëse komuniteti tjetër është i shqetësuar, siç është rasti me atë shqiptar dhe maqedonas. Duke e materializuar Marrëveshjen e Ohrit, shqiptarët do të ndihen sikur qytetarë të vërtetë të këtij shteti.
Kapital: A mund të mbijetojë Maqedonia multietnike duke marrë parasysh hendekun që e shkaktoi lufta?
Ahmeti: Është e sigurtë se Maqedonia mund të mbijetojë si shoqëri multietnike. Vetëm me një kusht. politikanët të mos ushtrojnë terror politik mbi qytetarët. Unë vërtetë nuk besoj se marrëdhëniet ndërmjet maqedonasve dhe shqiptarëve janë deri në atë shkallë të këqija në të cilat politikanët dhe mediumet i paraqesin ato. Prandaj të gjithë duhet të angazhohemi, mediumet dhe politikanët që t`u ndihmojmë qytetarëve. Gjatë këtyre proceseve në të cilat ne jemi vetëm aktorë. Duhet që detyrat t`i kryejmë me sukses të mirë që sa më shpejtë të integrohemi në Evropë. Në Maqedoni duhet të vendosen standarde evropiane të jetesës. Qytetarët të mos dallohen sipas përkatësisë etnike, por të trajtohen si qytetarë të cilët i takojnë vetë shtetit.
Kapital: Shqiptarët në Maqedoni kanë përfaqësues edhe në Parlament edhe në Qeveri. A keni vendosur se shqiptarët ndihen të mashtruar nga përfaqësuesit e tyre politikë? A do të formoni parti?
Ahmeti: Partitë politike shqiptare gjatë këtyre dhjetë viteve kanë qenë totalisht të margjinalizuara. Kërkesat të cilat janë parashtruar në Kuvend po ashtu kanë qenë të penguara ose të mbivotura. Janë zbatuar forma të parakohshme të cilat nuk kanë qenë në kundërshtim me format demokratike, si për shembull protestat në Gostivar, pastaj me Universitetin e Tetovës e tjera. Por, të gjitha kanë përfunduar me ndjekje dhe dhunë nga ana e Qeverisë. Ne të gjithë jemi qytetarë, nuk mund të mbijetojmë si indiferentë ndaj të gjitha këtyre ngjarjeve rreth nesh. Çdo hap drejt të mirës për qytetarët në Maqedoni është hap për të mirën personale, si individ. Kurr nuk do të pushojmë që ta japim maksimumin e vetëvetes për të mirën e qytetarëve në Maqedoni.
Kapital: Çka mendoni për deklaratën e deputetit Abdurrahman Aliti se me Marrëveshjen – kornizë përfundojnë të gjitha kërkesat e shqiptarëve në Maqedoni?
Ahmeti: Nuk mund t`i japim pikë cilësdo kërkesë, të cilitdo popull. Nuk mund t`i japim pikë kërkesave të shqiptarëve si dhe të popujve tjerë të cilët jetojnë në Maqedoni. Ekzistojnë kahje të ndryshme parlamentare për realizimin e këtyre kërkesave. Për mua është shumë e rëndësishme që të zvogëlohen frustrimet në çastin kur flitet për ngjarjet nacionale. Një zgjidhje e mirë duhet t`u jepet të gjitha ngjarjeve nacionale, të gjitha kërkesave nacionale, të gjitha etnikumeve në Maqedoni, me qëllim të mirëqenies së qytetarëve në Maqedoni.
Kapital: Cilat kërkesa janë ndoshta të ardhmet në listë?
Ahmeti: Nëse shikojmë sipërfaqësisht, gjuha shqipe nuk përdoret në të gjitha nivelet republikane. Ky është vetëm një segment por ka edhe tjera. Por, kjo nuk do të thotë se nuk do të gjindet mënyrë parlamentare për zgjidhjen e këtyre problemeve. Është shumë e rëndësishme që të krijohet kulturë qytetare në shoqëri. Të mos flitet vetëm për padrejtësinë e maqedonasit ndaj shqiptarit. Është shumë e rëndësishme që të flitet edhe për padrejtësinë e shqiptarit ndaj maqedonasit. Nëse e arrijmë këtë nivel të rezonimit, këtë mentalitet, një mentalitet të këtillë kulturor, atëherë ky është hap krejtësisht i mirë për më tutje.
Kapital: Duket se partitë politike të shqiptarëve nuk e bënë këtë. A do të krijoni ju konkretisht parti dhe cilën nga partitë ekzistuese e ndjeni më të afërt?
Ahmeti: Në këtë çast nuk mendojmë se do të krijojmë parti politike pasi që po ballafaqohemi me probleme të cilat kërkojnë zgjidhje të pandërprerë, amnistia nuk funksionon ashtu siç kemi paraparë, të burgosurit ende nuk janë në liri. ende ka njerëz të rinj të cilët nuk guxojnë të kthehen në Maqedoni. Pa dallim se cilit nacionalitet i takojnë ende kemi njerëz të cilët nuk janë kthyer në shtëpitë e tyre. Duke u ballafaquar me këto probleme ne ende nuk kemi pasur mjaft kohë për të menduar për koncepte të partisë politike.
Kapital: A do të thotë kjo se Marrëveshja e Prizrenit do të vazhdojë të vlejë? U shprehët se ka shumë punë, por kjo punë është bartur në fushën e politikës.
Ahmeti: Me rëndësi është që shqiptarët të veprojmë në pajtim me Marrëveshjen e Prizrenit. Me rëndësi është që të gjithë të angazhohemi në vendosjen e paqes, në uljen e tensioneve dhe në drejtimin i cili shpie nga materializimi i marrëveshjes paqesore.
Kapital: A e dini se ku janë maqedonasit e kidnapuar?
Ahmeti: Ashtu siç jemi të interesuar për fatin e këtyre dymbëdhjetë maqedonasve, po ashtu jemi të interesuar edhe për të gjithë ata shqiptarë të cilët nuk mund t`i gjejmë. Fati i tyre ende është i padefinuar. Por, nuk dëshirojmë të luajmë me fatin e tyre, nuk dëshirojmë që ta keqpërdorim këtë çast, duke i favorizuar ambicjet tona politike. Po bëjmë përpjekje që sinqerisht t`u ndihmojmë këtyre familjeve, qofshin ata të vdekur ose të gjallë.
Kapital: A mund të presim pas shkrirjes së borës zhvarrosje të shumë varrezave masive nga të dyja palët?
Ahmeti: Është shumë e rëndësishme që të angazhohemi që të ndriçohet e vërteta.
Kapital: Në Shipkovicë valojnë vetëm flamuj shqiptarë? Si do të ndërtohet besimi ndërmjet maqedonasve dhe shqiptarëve?
Ahmeti: Sa u përket simboleve të një etnikumi, për atë duhet të vendosin qytetarët. Duhet të ekzistojë ligj për këtë. Sipas Marrëveshjes së Ohrit, çdo etnikum e ka stemën dhe flamurin e vet.
Kapital: Por, çka me objektet publike të cilat janë shprehje e shtetësisë?
Ahmeti: Mësa normale, flamuri shtetëror duhet të pranohet edhe nga shqiptarët edhe nga të gjitha të tjerët, e jo vetëm simboli i etnikumit të caktuar. E sa i përket besimit kjo shumë varet nga politikanët dhe mediumet. Por, unë vërtetë mendoj se nuk janë aq të këqija raportet ndërmjet maqedonasve dhe shqiptarëve ose cilitdo etnikum tjetër. Atë e dëgjoj nga politikanët dhe mediumet, por unë nuk e mendoj atë. Ajo mund të bëhet me punë të përditshme. Për shembull, kemi polici multietnike, kjo është shembull i majftueshëm konkret. Çdo vonesë që kontribon në prolongimin e Marrëveshjes së Ohrit, kontribon në prolongimin e realizimit të Marrëveshjes së Ohrit dhe rritjen e skepticizmit për atë se a mund të funksionojë shteti. Projekti ynë është para nesh. Edhe për maqedonasit edhe për shqiptarët. Asgjë tjetër nuk kërkohet, vetëm të realizohet ky projekt.
Kapital: A do të varet ardhmëria e Maqedonisë nga ardhmëria e Kosovës?
Ahmeti: Është shumë i rëndësishëm një çast, të qetësohen epshet të cilat shpiejnë deri te rezonimi se shqiptarët ëndërrojnë për Shqipëri të madhe, Kosovë të madhe. Ne në Maqedoni duhet t`i gjallërojmë të drejtat të cilat sipas natyrës i kemi, për ta sendërtuar shtetin në të cilin ekzistojmë. Kosova ka kufij të vetë, parti të veta politike, udhëheqësi të vet. Problemi në Kosovë nuk duhet të na imponohet neve. Është evident fakti se për fat të keq Kosova është shfrytëzuar si mbulesë e ndonjë strategjie politike, të ndonjë partie politike, duke pohuar për shembull se konflikti nga Kosova është bartur në Maqedoni. Këtu nuk ka asgjë të vërtetë.
Kapital: Dëshironi të thoni se nuk kishit kurrfarë përkrahje nga Kosova për luftimet këtu në Maqedoni?
Ahmeti: Ne në këtë temë jemi shumë të hapur. Ishim totalisht të pavarur, edhe në aspektin politik edhe në atë ushtarak. Por, nuk mund të mohojmë se tek ne janë paraqitur edhe vullnetarë të cilët përmes familjeve janë të lidhur me Maqedoninë.
Kapital: Si e vlerësoni faktin që një numër i madh i të rinjve shqiptarë jetojnë jashtë Maqedonisë? Ka edhe maqedonas, shumë më tepër shqiptarë po migrojnë nga Maqedonia?
Ahmeti: Burim i kësaj është trajtimi i pabarabartë i të rinjve në Maqedoni, kështu që ata nuk kanë pasur rrugëdalje tjetër, ata kanë qenë të detyruar të shkojnë jashtë, për të fituar kafshatën e bukës.
Kapital: Pse atëherë gjatë dhjetë viteve të kaluara nuk dëgjuam nga shqiptarët kërkesa për tejkalimin e papunësisë, varfërisë, çështjet ekonomike në përgjithësi?
Ahmeti: Në mënyrë të ndryshme janë matur punët në këtë drejtim. Shqiptarët kanë marrë pjesë në mënyrë të ndryshme në ndarjen ose në procesin e privatizimit. Ndaj edhe janë angazhuar në mënyrë të mëvetësishme, që me forcat mëvetësuese të sendërtojnë diçka.
Kapital: Mirëpo, ndihet sikur të jenë pajtuar me problemet në sferën e ekonomisë, për dallimin nga politika.
Ahmeti: Zgjidhja e thjeshtë e problemeve politike, kontribon për zgjidhjen e problemeve ekonomike.
Kapital: A do të thotë kjo se tani do të dëgjojmë replika të tilla?
Ahmeti: Me siguri, po. Me siguri do të ballafaqohemi me probleme të cilat në mënyrë të drejtpërdrejt janë të lidhura me ekonominë. Me siguri në një të ardhme të afërt do të ballafaqohemi me problemin korpulent, papunësinë. Me një numër të madh të njerëzve të papunë ne shumë turbullt do të mund të shikojmë nga e ardhmja.
Kapital: Mirëpo, zoti Ahmeti, nobelisti për ekonomi, Poll Samjuellson bën lidhje të drejtpërdrejt ndërmjet shpërthimit demografik dhe varfërisë. A mendoni se shpërthimi demografik tek shqiptarët drejtpërsëdrejti shpie nga varfërimi jo i shqiptarëve, por i vendit në tërësi?
Ahmeti: Unë megjithatë them se nëse krijohen vende pune, shteti pasurohet. Por, ky shtet nuk krijoi vende pune për ata jerëz të cilët para 20 viteve kanë kërkuar të punësohen. Tani dëgjoj një situatë të re. Po mbyllet fabrika në Jegunovc, do të thotë obstruksione të reja. Dhe pyetem se ku shkojnë ata njerëz, si do të jetojnë ata?
Kapital: Çka mendoni zoti Ahmeti, për analizat e revistave dhe organizatave botërore të cilat Maqedoninë e llogarisin si hallkë të rëndësishme në tregtinë me drogë, e disa këtë e ndërlidhin në mënyrë të dretpërdrejt me shqiptarët?
Ahmeti: Sigurisht se në Maqedoni, por edhe në vendet fqinje ballkanike koncepti i vetëm për multietnicizëm ishte në fushën e kontrabandës. Ne nuk kishim institucione multietnike, por kishim dukuri të dëmshme multietnike dhe kriminalitet.
Kapital: A financohej UÇK-ja përmes tregtisë me drogë?
Ahmeti: Jo, këto janë të pavërteta. Shpifje të disa strukturave.
Kapital: Si financohej UÇK-ja?
Ahmeti: Kjo nuk është diçka që duhet fshehur. UÇK-ja financohej prej neve, popullatës shqiptare në Maqedoni. Dhe kemi listë për secilin njeri që ka dhënë të holla.
Kapital: Mirëpo konfirmohet se megjithatë është ushtruar presion mbi popullatën shqiptare, që të japë para, por edhe fëmijët e vet në radhët e UÇK-së.
Ahmeti: Këto janë të pavërteta. Të gjithë ushtarët ishin vullnetarë. Madje ne bënim përpjekje për ta respektuar rregullën që asnjëri nën 18 vjetë nuk guxon të jetë në radhët tona. Kishte raste kur na jepnin data të rrejshme të lindjes së tyre, pikërisht për shkak të asaj se kanë dëshiruar të jenë në radhët tona. Por, do të vijnë edhe kohëra të tilla kur do të qetësohen epshet. Ne kemi pasur edhe përkrahje dhe ndihmë edhe nga popullata maqedonase.
Kapital: Dëshironi të thoni se kjo ishte lëvizje?
Ahmeti: Nuk mund ta definoj karakterin. Pyetje e këtillë më është parashtruar edhe nga një përfaqësuese e një institucioni ndërkombëtar. Edhe pyetja e saj ishte – pse nuk na thirrët edhe neve maqedonasve në luftë kundër pushtetit të korruptuar? Ajo vërtetë më vendosi në një pozitë pa përgjigje. E vetmja gjë që mundesha t`ia them është se së paku unë, nuk kam parë kurrfarë sinjalesh se ju dëshironi të na përkrahni në luftën kundër një pushteti të korruptuar.
Kapital: Por, edhe pas luftës pushteti mbeti i njëjtë?
Ahmeti: Por, kjo nuk do të thotë se ne nuk duhet bashkërisht të mendojmë që t`u kundërvihemi këtyre autoriteteve të korruptuara, bashkërisht të punojmë drejt ndërrimit të këtij mentaliteti.
Kapital: Por, Xhaferi mbeti në pushtet edhe pas daljes së LSDM-së prej tij?
Ahmeti: Nuk mund të paramendojmë shtet pa pushtet. Medoemos duhet të ketë çfarëdo pushteti. Ne duhet të mendojmë shumë fort për zgjedhjet e ardhshme. Ja unë do të përdor një deklaratë të zotit Adem Demaçi – Kur njeriu shkon në treg për të blerë lopë, ai së pari pyet nëse ajo lopë prodhon njaft qumësht. Ne i zgjedhim deputetët tanë pa pyetur se cilat janë virtytet e tyre, cilësitë e tyre.
Kapital: A japin Xhaferi dhe Thaçi mjaft qumësht, zoti Ahmeti?
Ahmeti: Duhet matur njerëzit, kjo është me rëndësi. Unë mendoj se duhet shumë seriozisht të mendohet për zgjedhjet e ardhshme. Dhe kur them kështu, unë mendoj në bashkëpunim të ngushtë ndërmjet etnikumit maqedonas dhe shqiptar, bashkëpunim shumë të afërt. Nga ky bashkëpunim do të varen shumë gjëra në zgjedhjet e ardhshme.
Kapital: Do të thotë nga kjo mund të përfundojmë se nuk do të formoni parti tani pasi që nuk ka ardhur çasti për të krijur parti maqedonaso-shqiptare?
Ahmeti: Pa marrë parasysh se cili është vizioni ynë, nëse pyetem unë, në Maqedoni pas tetë, dhjetë viteve, nuk duhet të mendohet për parti etnike, por për formimin e një partie në bazë të ideve programore, e jo ideve partiake, nacionale. Idetë socialdemokrate janë tërësisht të njëjta edhe për maqedonasin edhe për shqiptarin, gjermanin … Tek ne demokracia kuptohet si kontribut për marketing të shtetit. Me rëndësi është të ketë demokraci, pa dallim mbi çfarë programi bazohet kjo parti.
Kapital: Me cilën nga partitë politike maqedonase do të bashkëpunonit?
Ahmeti: Shumë pak për këto njëzet vite kam jetuar në Maqedoni, ndaj edhe nuk i njoh mjaft partitë politike maqedonase. Për mua është e rëndësishme se si veprojnë dhe çfarë programi mbrojnë. Me rëndësi është se sa do të punojnë në sendërtimin e shtetit.
Kapital: Mirëpo keni kontakte të mira edhe me PPD-në edhe me PDSH-në. Të parët janë në koalicion me LSDM-në, të dytit me VMRO-DPMNE-në. Me cilën nga partitë maqedonase do të hynit në koalicion?
Ahmeti: Çdoherë kam vlerësuar se duhet haptazi të bisedohet për çështjet maqedonase dhe shqiptare me cilëndo parti politike në Maqedoni. Deri tani jemi angazhuar që shqiptarët të mos jenë pengesë për të gjitha proceset në Maqedoni, dhe të mos e keqpërdorim kapitalin politik në situatën në të cilën gjendemi, duke thënë se unë jam patriot më i madh se ti.
Kapital: Sa viktima ka pasur UÇK-ja në luftë? A vlente të luftohej? A mund të zgjidheshin gjërat pa luftë?
Ahmeti: Ne kemi gjashtëdhjetë e katër viktima nga radhët tona dhe diku rreth 35 civilë… Nëse prej më përpara do të punoheshte me mençuri, që të mos krijohen situatë të këtilla, me siguri do t`i shmangeshim luftës. Por, edhe në këtë moment kur shpërtheu lufta në Maqedoni, nëse mendohej më mirë, me siguri nuk do të vinte deri te kjo situatë. Megjithatë me angazhim më të madh të faktorit ndërkombëtar, mendoj se iu shmangëm më të keqes.
Kapital: A dëshironi të thoni se i erdhi fundi radikalizmit të shqiptarëve?
Ahmeti: Shqiptarët nuk hynë në luftë për shkak se janë radikalë. Ata hynë në luftë pasi që nuk kishte rrugëdalje tjetër.
Kapital: A frikësoheni nga ajo se do të përgjigjeni para gjyqit në Hagë?
Ahmeti: Jo, nuk frikësohem.
Kapital: A kishte në radhët e luftëtarëve të UÇK-së muxhahedinë, sa ishte përkrahja prej vendeve islamike?
Ahmeti: Nuk është e vërtetë se në radhët tona ka pasur muxhahedinë, dhe nuk kemi pasur përkrahje prej vendeve islamike. Përkrahja vinte vetëm prej shqiptarëve.
Kapital: Prej atyre në Maqedoni?
Ahmeti: Nëntëdhjetë e nëntë për qind prej shqiptarëve në Maqedoni.
Kapital: E ajo një për qind?
Ahmeti: Ata ishin vullnetarë prej Kosovës, Shqipërisë, Zvicrës, Gjermanisë, Francës. Por flas vetëm për një për qind.
Kapital: Nëse dikush ju pyet që të bëni dallim ndërmjet UÇK-së, IRA-s dhe PLO-së. Cilat janë dallimet ndërmjet këtyre organizatave?
Ahmeti: UÇK-ja ka rregullin, amblemën, uniformën, e respekton Konventën e Gjenevës, e respekton Tribunalin e Hagës. Asnjëherë nuk ka qenë dhe nuk është misterioze. Ka komandë, rregull dhe respektohet hierarkija.
Kapital: Thoni se Ushtria juaj erespekton Konventën e Gjenevës, por megjithatë dëshmitarët flasin për malltretimin e civilëve, kishte kidnapime …
Ahmeti: Ata të cilët kanë maltretuar do të përgjigjen. Ata i kanë keqpërdorur parimet, rregullat dhe koncepcionet tona të UÇK-së./LOBI NR.48