O’Conell: Deri kur do të ketë Kosova mbështetje ndërkombëtare kur nuk lufton krimin dhe korrupsionin

Kosova ka momentin e fundit që të luftojë korrupsionin dhe krimin e organizuar në mënyrë që të mos humbasë mbështetjen ndërkombëtare.

Kështu tha ambasadori i Britanisë së Madhe në Kosovë, Ruairi O’Conell, në tryezën me temë: “Pandëshkueshmëria e korrupsionit, rrezik për shoqërinë dhe shtetin”/ “Zgjidhja: Integritet, transparencë, llogaridhënie?”.

Ai tha se bashkësia ndërkombëtare ka investuar shumë në Kosovë dhe për këtë nuk mund të pranojë dështimin.

“Sot do të jem më i drejtpërdrejt dhe kjo vjen nga dashuria për Kosovën. Mungesa e rezultateve dhe pandëshkueshmëria e krimeve mbetet problem në Kosovë. Pse nuk po ndëshkohet krimi i rëndë në Kosovë. Ju në baza ditore merreni me këtë punë. Ju lutem na tregoni se ku qëndron problemi. Ne nuk duam të pranojmë dështimin. Nuk mund të pranojë as komuniteti ndërkombëtar. Ne kemi investuar shumë në këtë vend. Ligjet janë përmirësuar vazhdimisht, nuk janë problem ligjet e as kushtet e punës. Sa i përket pagave, të gjithë e dimë se jeni më të paguarit në Kosovë. Kosova nuk duhet të jetë strehimore e krimit dhe korrupsionit. Tash e kam edhe një pyetje? Deri kur do të vazhdojë Kosova të ketë përkrahjen e bashkësisë ndërkombëtare kur vazhdon të dëshmojë mungesën e luftimit të korrupsionit dhe krimit të organizuar. Është koha e fundit që zyrtarët me integritet të kontestuar të ecin nga pozitat.. ndryshime të tilla i duh en policisë, gjyqësorit dhe prokurorisë. Politika duhet t’i mbajë duart larg nga këto institucione. Nuk po e zgjasë shumë sepse nuk ka kohë. Nuk ka kohë as për Kosovën dhe për sistemin e drejtësisë. Prokurorët dhe gjyqtarët e Kosovës duhet të jenë heronjtë e rinj të Kosovës”, tha O’Conell.

Ehat Miftaraj nga Instituti i Kosovës për Drejtësi, tha se gjetjet e IKD-s në këto vite është se korrupsioni në Kosovë është endemik.

Deputetja Albulena Haxhiu, tha se korrupsion ka në çdo vend, por theksoi se në vendet e zhvilluara korrupsioni hetohet dhe luftohet. Edhe ajo u shpreh pro vetingut, porse theksoi se këtë duhet ta bëjë vet Kosova e jo përfaqësuesit e ambasadave. Kjo sipas saj, pasi është momenti i fundit që Kosova t’i marrë përgjegjësitë në duart e veta. “Për mua janë shqetësuese dënimet me kusht. Ato inkurajojnë korrupsionin. Hyni në web faqen e Agjencionit Kundër Korrupsionit, është e pamundur që ajo pasuri e deklaruar të jetë fituar në mënyrë ligjore. Nuk kemi pasur as minimumin e vullnetit politik për të luftuar krimin dhe korrupsionin”, u shpreh ajo.

Ministri i Drejtësisë, Abelard Tahiri, tha se nuk mendon se mungon vullneti politik në vend. Teksa shtoi se për vetingun duhet bërë një analizë, pasi që sipas tij nuk mundet gjithmonë Kosova të shkoj me themelimin e institucioneve.

Ai tha se kanë arritur një reformim të thellë në luftën kundër korrupsionit dhe krimit të organizuar.

Skënder Çocaj, kryesues i Këshillit Gjyqësor të Kosovës, tha se llogaridhënia dhe transparenca do të jenë prioritetet e tij. Kryesuesi i Këshillit Prokurorial të Kosovës, Bahri Hyseni, tha se edhe sot nuk janë të kënaqur me luftimin e korrupsionit dhe krimit të organizuar.

Ai tha se te korrupsioni është problemi i numrit të madh të njerëzve të akuzuar, porse nuk ka shumë vendime përfundimtare.

Drejtori i Përgjithshëm i Policisë së Kosovës, Rashit Qalaj, tha se është e nevojshme që strukturat udhëheqëse të Policisë të përkrahin hetuesit. /kp/Telegrafi/

TAGS