Protestohet në Gjakovë: Mjaft më me vrasjen e vajzave dhe grave (Live)

Protestohet në Gjakovë: Mjaft më me vrasjen e vajzave dhe grave (Live)

Shoqëria Civile e Gjakovës në përkrahje nga Rrjeti i Grave të Kosovës, sot po protestojnë në Gjakovë për të  kundërshtuar vrasjen e gruas 40 vjeçare dhe vajzës së saj, në Brekoc të Gjakovës, dhe për të kërkuar përgjegjësi nga institucionet e Kosovës për këtë dhe shumë raste të tjera të dhunës në Kosovë.

Kjo protestë është organizuar si reagim kundër vrasjes së dyfishtë si pasojë e dhunës në familje, në Komunën e Gjakovës.

Të pranishme në protestë janë edhe deputete të Kuvendit të Kosovës, ish-presidentja Atifete Jahjaga.

Në këtë protestë qytetarët po mbajnë parulla si “Reagoni në kohë”,  “Mos shfajësoni fajtorët” eyj, ndërsa disa nga të pranishmit kanë veshur bluza me fotografinë e të ndjerës Valbona Ndrecaj, e cila para disa dite u vra nga bashkëshorti i saj.

“Individ e aktivistë/e nga shoqëria civile, të bashkuar/a kërkojmë t’i japim fund dhunës dhe t’u themi të gjitha institucioneve në Kosovë dhe shoqërisë kosovare kundërshtimin tonë me një fjali të vetme ‘Mjaft më me arsyetime’!”, thuhet në njoftim.

“Dhuna në familje është krim, dhe si e tillë duhet trajtuar. Dështimi në ofrim të mbrojtjes për gratë dhe vajzat që raportojnë dhunën na qon deri tek vrasja e tyre nga ushtruesit e dhunës”, thuhet më tej në njoftim. /Telegrafi/

TAGS