Vazhdon punimet konferenca infermierore

Vazhdon punimet konferenca infermierore

Konferenca “Nderojmë të kaluarën, ndërtojmë të ardhmen”, ka vazhduar punimet në ditën e dytë,  ku pos referimeve për rolin e infermierëve gjatë periudhës së lutës është planifikuar që të bëhet një vizitë në ish Spitalin Ushtarak në Zonën e Nerodimes

Në ditën e dytë të konferencës shkencore “Nderojmë të kaluarën, ndërtojmë të ardhmen”, e cila po mbahet për herë të parë nën patronatin e Odës së Infermierëve të Kosovës, po trajtohen tema me interes për zhvillimin infermieror por edhe për rolin e infermierëve gjatë luftës në Kosovë.

Hapjen e punimeve e bëri kryetari i Odës së Infermierëve të Kosovës, Naser Rrustemaj, derisa të pranishmit i përshëndeti deputetja Time Kadriaj, anëtare e Komisionit për Shëndetësi në Kuvendin e Kosovës.

“Është privilegj për mua të jem këtu. Ne asnjëherë nuk duhet të harrojmë të kaluarën. Andaj edhe po më pëlqen kjo moto: ‘Nderojmë të kaluarën, ndërtojmë të ardhmen’, ka thënë deputetja Kadriaj.

Kadriaj është shprehur se asnjëherë nuk duhet harruar sfidat që ka kaluar populli i Kosovës për të arritur qëllimin e lirisë dhe për të shkuar drejt të së ardhmes.

Sot, në ditën e dytë të konferencës pos që do të vazhdojnë së referuari temat për rolin e infermierit gjatë luftës do të bëhet edhe një vizitë në Spitalin Ushtarak në Zonën e Nerodimes, ku janë dhënë shërbime mjekësore për ish luftëtarët e UÇK-së si dhe civilët që kishin nevojë për shërbime mjekësore gjatë luftës. /Telegrafi/

TAGS